Хрватскиот репрезентативец Лука Модриќ се извини за пцовките кон словенечкиот судија Дамир Скомина, момент кој го фатија камерите на мечот Реал Мадрид - Манчестер Сити.
По одлична игра, Модриќ излезе во 88’ минута и крајот го испрати од клупата. После еден старт над Роналдо кој Скомина не го санкционираше, Модриќ скокна од клупата и пцуеше „мајка словенечка“. Неговиот испад набрзо го осудија словенечките медиуми, а ним им се придружи и ФАРЕ, здружението кое се бори против дискриминација.
„Дури кога ја видов снимката се свестив каква простачка реакција сум имал. Ме понесе еуфоријата. Незгодно ми е затоа што тоа не е мој обичај. Се извинувам на сите кои ги навредив и на Скомина и на сите други, пред се во Словенија. Не е во ред и не смеев да си допуштам такво нешто. Се срамам“, изјавил Модриќ за хрватски Спортски новости.
Реал со триумфот од 1:0 против Манчестер Сити се пласираше во историското 14. финале од Лигата на шампионите. „Кралевите“ на 28. мај од 20:45 на Сан Сиро ќе играат против Атлетико Мадрид.
