Сол Алински: Правила за радикали

По трагите од едно видео во кое новинар на руската државна телевизија упаѓа во Менада во чаршија (драматично тврдејќи: „Само одбрани луѓе знаат за ова место“ ?!) и му паѓа во око што тоа читаат луѓето кои се собираат таму. Па книгата нè заинтересира. Малку. 

Со идеја „да го раскринка Сорос во Македонија“, новинаров театрално упаѓа во Менада, доаѓа до полиците за книги и наидува на книгата на Сол Алински, своевремено ментор на Хилари Клинтон. А таму е и Ивана - студентка, партиски донатор, пратеничка - Туфегџиќ, да се објаснат.

Целата книга ја имате овде (.пдф, на аглиски).

Нема да ја обработуваме детално бидејќи ние сакаме и за други теми да пишуваме, со надеж дека некогаш ќе помине ова колективно бунило па човек ќе се заинтересира што тоа се случувало овде и на планетава а не било дел од Пржино 1, 2, 3, 4...

Накратко, 13-те правила за радикали на Алински:

1. „Моќта не е само она што го имаш, туку и она што непријателите мислат дека го имаш“.
Моќта има два главни извора - пари и луѓе. „Немашните“ (Have-Nots) мора да градат моќ преку крв и месо.

2. „Никогаш не излегувај надвор од експертизата на твоите луѓе“.
Ова резултира со збрка, страв и повлекување. Чувството на сигурност е потпора за сите.

3. „Секогаш кога е можно, излези надвор од експертизата на непријателот“.
Барај начини да ги зголемиш несигурноста, стравот и непредвидливоста.

4. „Натерај го непријателот да живее според неговиот список правила“.
Ако правилото е дека секое писмо мора да добие одговор, испрати 30.000 писма. Можеш да ги потепаш со ова затоа што никој не може да ги следи буквално сите сопствени правила.

6. „Исмевањето е најсилното човечко оружје“.
Нема одбрана. Ирационално е. Поттикнува гнев. Функционира и како клучен елемент за присилување непријателот да направи отстапки.

6. „Добра тактика е онаа во која твоите луѓе уживаат“.
Ќе ја спроведуваат без да бидат терани на тоа, и ќе бидат истрајни. Ќе ја сметаат за нивна работа, па дури и ќе предложат подобри опции.

7. „Тактика која предолго се применува станува досадна“.
Немој да станеш стара вест.

8. Оддржувај го притисокот. Никогаш не попуштај.
Постојано пробувај нови нешта за да ѝ ја нарушуваш рамнотежата на другата страна. Кога таа ќе се навежба за еден пристап, удри ја по плексус со нешто сосема ново.

9. „Заканата често е многу пострашна отколку нејзината содржина“.
Фантазијата и егото може да замислат многу повеќе последици отколку кој и да е активист.

10. „Главната премиса за тактика е развој на операции кои ќе оддржуваат постојан притисок врз непријателот“.
Токму овој непрекинат притисок резултира со реакции од опозицијата која е суштинска за успехот на кампањата

11. „Ако доволно силно туркаш нешто негативно, тоа ќе се пробие и ќе стане позитивно“.
Насилството од другата страна може да ја преобрати јавноста во твоја полза, затоа што таа сочувствува со послабиот.

12. „Цената на успешен напад е конструктивна алтернатива“.
Никогаш не дозволувај непријателот да добие поени затоа што си фатен без да имаш решение за проблемот.

13. „Одбери цел, лоцирај ја, персонализирај ја и поларизирај ја“.
Пресечи ја мрежата на поддршка и изолирај ја твојата мета од какво и да е сочувство. Цели кон луѓе а не кон институции; луѓето се поранливи од институциите.

Инаку, поднасловот на книгата на Алински е:
Прагматичен прирачник за реалистички радикали

Кој си чита, си знае.

 

27 март 2017 - 11:30