Древна кинеска приказна

Старецот и белиот коњ

„Секое зло за добро“, вика нашиот народ. Но исто така и - „Многу арно не е на арно“. Некаде по истата патека се движи и клатното на среќата и несреќата во оваа древна кинеска приказна. 

Си беше еднаш еден стар човек, кој живееше во мало селце. Иако беше сиромашен, сите му завидуваа, затоа што имаше убав бел коњ. Дури и кралот копнееше по неговото богатство. Такво животно никој немаше видено претходно - таков беше неговиот сјај, неговата величественост, неговата сила.

Луѓето нудеа огромни суми за него, но стариот секогаш одбиваше. „Овој коњ за мене не е коњ“, им велеше. „Тој е личност. Како би можел да продадам личност? Тој е пријател, не е сопственост. Како би можел да продадам пријател?“. Човекот беше сиромашен и искушението беше големо. Но тој никогаш не го продаде коњот.

Едно утро сфати дека коњот не е во шталата. Целото село дојде да му фаќа сеир. „Старо дртало“, му велеа тие, „ти рековме дека некој ќе ти го украде коњот. Те предупредивме дека ќе бидеш ограбен. Толку си беден. Како воопшто мислеше дека ќе заштитиш толку вредно животно? Ќе беше подобро да го продадеш. Можеше да добиеш онолку пари колку што ќе посакаш. Ниту една сума немаше да биде премногу висока. Сега коњот го нема, и ти си проколнат“.

Старецот одговори: „Не избрзувајте. Кажете само дека коњот не е во шталата. Тоа е сè. Дали сум проколнат или не, како можеме да го знаеме тоа? Како да го просудиме?“

Луѓето се противеа: „Немој да нè правиш недоветни! Можеби не сме филозофи, но тука не е потребна никаква филозофија. Едноставен факт е дека тоа што твојот коњ исчезна е клетва“.

Старецот повторно проговори: „Сè што знам е дека шталата е празна, и дека коњот го нема. Останатото не го знам. Дали тоа е клетва или благослов, не можам да кажам. Сè што можеме да видиме е фрагмент. Кој може да каже што ќе се случи следно?“

Селаните се смееа. Мислеа дека човекот е луд. Секогаш мислеа дека е будала; да не беше, со време ќе си го продадеше коњот и ќе живееше од парите. Наместо тоа, беше сиромашен дрводелец, кој на старост се уште сечеше дрва за огрев, ги м’кнеше од шумата и ги продаваше. Живееше од денес за утре, во бедата на сиромаштијата. Сега докажа дека навистина е нетокму.

По петнаесет дена, коњот се врати. Не бил украден; избегал во шумата. Не само што се врати, туку со себе донесе уште дванаесет диви коњи. Повторно, селаните се собраа околу дрводелецот и проговореа. „Старецу, ти беше во право, а ние не. Она што мислевме дека е клетва, беше благослов. Те молам, прости ни“.

Човекот одговори: „Повторно, одите предалеку. Кажете само дека коњот се врати. Раскажете дека дузина коњи се вратија со него, но не судете. Како знаете дека ова е благослов? Можете да видите само фрагмент. Освен доколку ја знаете целата приказна, како можете да судите? Читате само една страница од книга. Како можете да ја процените целата? Читате само еден збор од една реченица. Како можете да ја разберете целата реченица?“

„Животот е толку огромен, па сепак го судите целиот врз основа на само една страница или еден збор. Сè што имате е еден фрагмент! Не велете дека ова е благослов. Никој не знае. Задоволен сум со она што го знам. Не ме вознемирува она што не го знам“

„Можеби стариот е во право“, си рекоа еден на друг. Затоа овој пат не рекоа многу. Сепак, длабоко во себе, тие знаеа дека тој греши. Беа сигурни дека ова е благослов. Дванаесет диви коњи беа вратени. Со малку работа, животните можеа да бидат припитомени и истренирани, и продадени за доста пари.

Старецот имаше син, единец. Момчето почна да ги припитомува коњите. По неколку дена, тој падна од еден од нив и ги скрши обете нозе. Повторно селаните се собраа околу старецот и ги искажаа своите судови.

„Ти беше во право“, рекоа. „Го докажа тоа. Дузина коњи не се благослов. Тие беа клетва. Твојот син-единец ги искрши обете нозе, и сега ти на стари години немаш одмена. Сега си посиромашен од кога и да е.“

Старецот повторно проговори. „Вие луѓе сте опседнати со давање судови. Не одете толку далеку. Кажете само дека мојот син ги скрши двете нозе. Кој знае дали е тоа благослов или клетва? Никој. Имаме само фрагмент. Животот ни се прикажува во фрагменти“.

По неколку недели се случи земјата да почне војна против свој сосед. Сите млади луѓе од селото мораа да одат во војска. Само синот на старецот не мораше, затоа што беше повреден. Повторно луѓето се собраа околу стариот, плачејќи и врескајќи затоа што нивните синови беа заминале. Шансата дека ќе се вратат беше мала. Непријателот е силен, па војната најверојатно ќе биде загубена. Никогаш повторно нема да си ги видат децата.

„Ти беше во право, старецу“, јачеа. „Бог знае дека беше во право. Ова е доказ. Несреќата на син ти беше благослов. Можеби нозете му се скршени, но барем е со тебе. Нашите синови заминаа засекогаш“

Старецот повторно проговори: „Невозможно е да се зборува со вас. Секогаш извлекувате заклучоци. Кажете го само ова: вашите синови заминаа во војна, мојот не. Никој не знае дали тоа е благослов или клетва. Несреќата раѓа среќа, а среќата несреќа. Ова е бесконечно, и неговите длабочини се немерливи“.

(преводот е компилација на неколку верзии на приказната, една од нив тука)

24 јуни 2017 - 11:35