Можеби ќе го портретира и Столе Попов

Сликите и поезијата на Жилиет Бинош

Бинош, освен импресивна актерска кариера, има и други таленти - пишува поезија и слика. Во еден од нејзините најнови филмови таа не само што игра професорка по уметност, туку и самата ги нанесува боите на огромните платна.

„Зборови и слики" е по малку лигава драма за некогашна позната сликарка, која поради прогресивниот реуматоиден артрит кој ѝ ги намалува можностите да слика е принудена да прифати место на професорка по уметност во едно средно училиште. Со нејзиниот колега (Клајв Овен, по малку остарен но сè уште заводлив), професор по книжевност, почнуваат дискусија, а потоа и отворена војна во која ги вклучуваат и учениците, за тоа што е поважно - зборовите или сликите. Помеѓу нив се случува и врска, која ја инспирира сликаркава повторно да почне да работи на нејзините големи платна, на кои слика со огромна четка, со кука закачена на таванот.

Сликите во филмот се навистина убави и очигледно направени од рака на некој што се разбира во целата работа. А тоа во случајов е - самата Бинош.

Актерка, танчерка, поетеса и сликарка, таа има разновидни таленти, кои им се непознати на оние кои ја знаат само од „Чоколадо" или „Англискиот пациент". Во 2009 на Петата авенија во Њујорк се одржа голема изложба на нејзини портрети, 58 мастила на хартија во форма на диптиси, на кои се претставени голем број од режисерите и колегите со кои работела, но и ликовите кои ги играла во нејзините филмови. Има издадено и двојазична, француско-англиска монографија со нејзините дела, под наслов „Портрети во очи".

„Страста и емоцијата која мора да се генерира, исто како и физичката издржливост, се дел од актерскиот живот. Што и да остане од тоа, јас потоа го ставам на хартија. Ништо не е дефинитивно, тоа е само запис - непостојана и субјективна перцепција - на еден момент во животот. Техниката едноставно си дојде со желбата да се слика, без претходни конципирања", вели таа за нејзината уметност.

Некои до споменатите диптиси се придружени со песни напишани од Бинош. Една од нив е посветена на ликот на Хана во „Англискиот пациент":

пребарувајќи во битката на постоењето
се обидувавме да ѕирнеме на другата страна
танцот нè зема в раце
благослов на зелената природа во земјата на маслото и виното
твоите идеи ми станаа реалност
играјќи школка ноќе
симнувајќи се до сликите на твојата имагинација
растев во чекори и скокови
ароматичното масло се мешаше со косата
ги трасиравме нашите животи
твојот повик дојде тивко
јас бев твој ангел додека ми ги отвараше крилјата
би скокала засекогаш
на најсветото место
копнеејќи за чувство на доверба
на љубов вон самите нас
ме научи да бидам похумана, ме подигна како подарок
стапала раце глави и срца
чекоревме заедно како животот да се случува на друго место
со радост со радост

Жилиет Бинош, 1997

Видео во кое Бинош го објаснува процесот на создавање на ликот на сликарката Дина од „Зборови и слики“. 

 

15 септември 2014 - 09:30