Најава на еден тренд?

На Тајванците веќе не им е до читање

Откако им го свртевме грбот, нашите некогашни стратешки пријатели од милијарда евра толку паднаа во депресија што ни книга не им се отвара.

Едно ново истражување направено од нивното Министерство за култура вели дека Тајванците, традиционално познати како големи „љубители на пишаниот збор", почнале да читаат само две книги годишно, што и не е баш за машала - светскиот просек за урбано возрасно население е 2 книги месечно.

Во извештајот на Министерството се вели дека издавачката индустрија во оваа земја е соочена со конкуренција од дигиталните медиуми, ама па и ова не е нешто специфично баш за Тајван, каде луѓето се и онака помалку онлајн во споредба со нивните соседи од Кина, Јапонија и Јужна Кореја, кои иако повеќе дремат на интернет сепак читаат, 4,3, 8,4 и 10,8 книги годишно. Истовремено пазарот на електронски книги во Тајван не цвета, затоа што издавачите се плашат од пиратирање.

Во последните години 70% од книжарите на улицата Чонгкуинг во Тајпеј која е позната токму по нив - затвориле. Библиотеки нормално постојат, но во нив најчесто седат постари луѓе кои превртуваат весници или студенти кои спремаат испити, а ретко служат за позајмување книги за лежерно читање дома. Домашните автори чии прозни дела во 1980-тите биле најчитаните во земјата, сега се заменети од странски бестселери, книги за самопомош и „50 нијанси сиво" - кога луѓето помалку читаат, и писателите помалку пишуваат. Она што е интересно е дека на прво место на еден популарен тајвански сајт за продажба на книги се две популарно-медицински - Бона-фиде медицина од Јанг Дингуи, и Секако дека можете да си го повратите видот, од Накакава Казухиро, која содржи очни вежби за луѓе кои имаат вакви проблеми, а останатото се осум преведени западни романи.

На крајот, можеби и не е баш најјасно зошто побогу Тајванците почнале да читаат толку малку, а уште понејасно е како оваа работа да се поправи. Но можеби нивниот случај е најава на она што наскоро ќе се појави како тренд и на други места. Да имаме на располагање статистика за Македонија ќе споредевме. Вака од Тајванците во нашиот регион сигурно читаат повеќе Хрватите (40% месечно читаат по една книга) и Србите (39% месечно по една книга). Хрватите дури направиле и детална статистика, според која Далматинците читаат повеќе од Загрепчани. Нешто како кога кај нас Охриѓани би биле поначитани од Скопјани. А заедно поначитани од Тајванците, со дури три книги годишно.

9 април 2013 - 15:38