Со настап во живо, ќе не почестат дел од наградените изведувачи: Гиш (La Colonie Volvox), Верка, КУР, Ласт Експедишн, Лоши Деца, Џака Накот, Гуру Харе, Конкуеринг Лајн, Санаториум и Чиста Околина.
Овие награди, музички ќе бидат збогатени од следниве бендови, артисти и диџеи:
Хроматик Поинт, Бета Хаус, Авторизација (Велес), Шинтер, Брука бенд, Фуснота, Project 2501, The Author (Охрид), Каин (Кичево), Барбарела, Диџеј Димитри ЈеЈа, Офф-Поп 103ка и други.
Манифестацијата е планирана да започне од 12:00 часот и до 16 часот, сцената ќе зрачи со звуците на македонски реге диџеи и селектори. Потоа на сцената ќе се појават и бендовите кои ќе дадат поддршка со нивните настапи. Во 18:00 часот, ќе започне и официјалниот дел од доделувањето на наградите. Водител на манифестацијата ќе биде долгогодишниот познавач на македонската алтернативна музика, господинот Јово Брамс. Доделувањето на наградите ќе трае до 01:00 часот, а потоа афтерпартито се сели на градската плажа во Парк до раните утрински часови каде што ќе ве забавуваат македонски диџеи со дабстеп, хаус, електронска и транс музика.
Ви најавуваме дека на оваа забавна наградна манифестација може да очекувате одлични изданија во живо, ред заблагодарување, ред почит, два реда достоинство, три реда гордост и до недоглед музика. За алтернативните луѓе и сите оние кои ќе ја посетат оваа манифестација, можат да си ја изгасат жедта за евтини пари на штандовите за продажба на пијалоци или да си купат цедиња, маици и друга роба од македонските алтернативни изведувачи.
